सुंदरकांड मंडळ व मित्र परिवार यांच्या वतीने दरवर्षीप्रमाणे यंदाही कावड यात्रेचे आयोजन करण्यात आले. श्रावण महिन्याच्या पवित्र मुहूर्तावर दुर्गा मंदिरापासून या यात्रेला प्रारंभ झाला.
यात्रेच्या प्रारंभी दुर्गा मातेची पूजा व विधिवत आरती करण्यात आली. यानंतर “हर हर महादेव” च्या घोषणांसह हजारो भाविकांसह कावड यात्रा मार्गस्थ झाली.
या यात्रेत *गडचिरोली विधानसभेचे माजी आमदार डॉ. नामदेव उसेंडी* यांनी उपस्थित राहून खांद्यावर कावड घेत पदयात्रेत सहभाग घेतला.
गेल्या *9 वर्षांपासून* अखंडितपणे सुरू असलेली ही परंपरा यंदाही तितक्याच श्रद्धेने पार पडली. गडचिरोलीतील दुर्गा मंदिर येथून सुरू झालेली ही पदयात्रा मार्कंडादेव मंदिरावर जाऊन समाप्त होणार आहे. तेथे कावडीतील पवित्र जलाने भगवान शंकराचा अभिषेक करून भजन व महाआरतीने यात्रेची सांगता होईल.
या धार्मिक सोहळ्याला शहरातील मान्यवर, व्यापारी, सामाजिक कार्यकर्ते तसेच मोठ्या संख्येने महिला व पुरुष भाविक उपस्थित होते. संपूर्ण मार्गावर ग्रामस्थांनी फुलांची उधळण करून यात्रेकरूंचे स्वागत केले.
