गडचिरोली टाइम्स दि. 23 सप्टेंबर :भामरागड तालुक्यातील अतिदुर्गम गावांच्या मूलभूत विकासाला प्राधान्य द्या – जिल्हाधिकारी अविश्यांत पंडा
*होड्री ते लष्कर व गोपणारपर्यंत दुचाकीने दौरा; रस्ते, पूल, आरोग्य, शिक्षण व अन्य सुविधांची प्रत्यक्ष पाहणी*
*लष्कर, गोपणार, मुरडपार, हॅलोदंडी व धिरंगी गावांत शासकीय योजनांचा लाभ जास्तीत जास्त पोहोचविण्याचे निर्देश*
भामरागड तालुक्यातील अतिदुर्गम लष्कर, गोपणार, मुरडपार, हॅलोदंडी आणि धिरंगी या गावांच्या मूलभूत विकासाला प्राधान्य देऊन विविध विभागांच्या लोककल्याणकारी व विकास योजनांचा लाभ जास्तीत जास्त पात्र नागरिकांपर्यंत पोहोचवावा. रस्ते, पूल, आरोग्य, शिक्षण, घरकुल व अन्य मूलभूत सुविधांमधील कमतरता निश्चित करून संबंधित विभागांनी आवश्यक कार्यवाही तात्काळ सुरू करावी, असे निर्देश जिल्हाधिकारी अविश्यांत पंडा यांनी दिले.
उच्च न्यायालयाच्या नागपूर खंडपीठाच्या आदेशाच्या अनुषंगाने जिल्हाधिकारी श्री. पंडा यांनी काल भामरागड तालुक्याचा विस्तृत दौरा केला. या दौऱ्यात त्यांनी ‘सेवा संकल्प अभियान’ अंतर्गत सुरू असलेल्या कामांसह पायाभूत विकासकामे आणि नागरिकांना उपलब्ध शासकीय सेवांचा आढावा घेतला. यावेळी पोलीस अधीक्षक एम. रमेश, जिल्हा परिषदेचे मुख्य कार्यकारी अधिकारी सुहास गाडे यांच्यासह विविध विभागांचे जिल्हा व तालुकास्तरीय अधिकारी उपस्थित होते.
*अतिदुर्गम भागात दुचाकीने पोहोचले अधिकारी*
दौऱ्याचे वैशिष्ट्य म्हणजे जिल्हाधिकारी श्री. पंडा यांच्यासह वरिष्ठ अधिकारी व संबंधित विभागांचे अधिकारी होड्री येथून लष्कर आणि गोपणार या अतिदुर्गम गावांपर्यंत दुचाकी वाहनांनी पोहोचले. या प्रत्यक्ष क्षेत्रभेटीत त्यांनी मार्गावरील दळणवळणाची स्थिती तसेच दुर्गम गावांमधील पायाभूत सुविधांची पाहणी केली. स्थानिक परिस्थिती आणि नागरिकांच्या मूलभूत गरजांची प्रत्यक्ष माहिती घेत संबंधित विभागांना आवश्यक कार्यवाहीच्या सूचना देण्यात आल्या.
*अतिदुर्गम गावांच्या विकासावर विशेष भर*
लष्कर, गोपणार, मुरडपार, हॅलोदंडी आणि धिरंगी या गावांच्या मूलभूत विकासासाठी प्रत्येक विभागाने आपल्या अखत्यारितील योजनांमधून पात्र नागरिकांना जास्तीत जास्त लाभ मिळवून द्यावा, असे जिल्हाधिकाऱ्यांनी निर्देशित केले. विविध शासकीय योजनांचे प्रभावी अभिसरण करून या गावांतील मूलभूत सुविधांमधील कमतरता दूर करण्यासाठी कालबद्ध कार्यवाही करावी. दुर्गमतेमुळे कोणताही पात्र नागरिक शासकीय योजना व सेवांच्या लाभापासून वंचित राहणार नाही, याची विशेष दक्षता घेण्याच्या सूचनाही त्यांनी दिल्या.
जिल्हाधिकारी श्री. पंडा, पोलीस अधीक्षक श्री. रमेश आणि मुख्य कार्यकारी अधिकारी श्री. गाडे यांनी लष्कर व गोपणार गावांना प्रत्यक्ष भेट देऊन तेथील परिस्थितीची पाहणी केली. रस्ते, पूल, आरोग्य व अन्य पायाभूत सुविधांशी संबंधित बाबींचा आढावा घेऊन प्रलंबित कामांवर संबंधित विभागांनी समन्वयातून तातडीने कार्यवाही करावी, असे निर्देश देण्यात आले.
*१६ वनहक्क पट्टेधारकांना ७/१२ उताऱ्यांचे वाटप*
या भेटीदरम्यान वनहक्क प्राप्त नागरिकांच्या महसुली अभिलेखांबाबतही कार्यवाही करण्यात आली. लष्कर येथील ५ आणि गोपणार येथील ११ अशा एकूण १६ वनहक्क पट्टेधारकांना ७/१२ उताऱ्यांचे वाटप करण्यात आले. वनहक्कधारकांना त्यांच्या पात्रतेनुसार विविध शासकीय योजनांचा लाभ मिळवून देण्यासाठी संबंधित विभागांनी आवश्यक कार्यवाही करण्याच्या सूचनाही जिल्हाधिकाऱ्यांनी दिल्या.
*लाहेरी प्राथमिक आरोग्य केंद्र व आरोग्य शिबिराची पाहणी*
जिल्हाधिकारी श्री. पंडा यांनी लाहेरी प्राथमिक आरोग्य केंद्राला भेट देऊन तेथील आरोग्य व्यवस्थेचा आढावा घेतला. परिसरातील नागरिकांसाठी आयोजित आरोग्य शिबिराचीही त्यांनी पाहणी केली. अतिदुर्गम भागातील नागरिकांना आवश्यक आरोग्य सेवा नियमित व वेळेत उपलब्ध होतील, याची आरोग्य यंत्रणेने दक्षता घ्यावी, असे निर्देश त्यांनी दिले.
यावेळी प्रधानमंत्री आवास योजनेतील लाभार्थ्यांना पूर्ण झालेल्या घरांच्या चाव्यांचे वाटप करण्यात आले. पात्र लाभार्थ्यांना घरकुल योजनांचा लाभ वेळेत मिळवून देण्यासह प्रलंबित घरकुलांच्या कामांना गती देण्याच्या सूचनाही संबंधित यंत्रणेला देण्यात आल्या.
*होड्रीतील बेली ब्रिज व जिल्हा परिषद शाळेची पाहणी*
दौऱ्यादरम्यान जिल्हाधिकाऱ्यांनी होड्री येथील बेली ब्रिजची पाहणी करून संबंधित अधिकाऱ्यांकडून सद्यस्थितीची माहिती घेतली. रस्ते व पुलांशी संबंधित आवश्यक कामांबाबत तातडीने कार्यवाही करण्याचे निर्देश त्यांनी दिले.
त्यानंतर त्यांनी होड्री येथील जिल्हा परिषद शाळेला भेट देऊन शाळेतील शैक्षणिक व मूलभूत सुविधांची माहिती घेतली. दुर्गम भागातील विद्यार्थ्यांना आवश्यक शैक्षणिक सुविधा उपलब्ध करून देण्यासाठी संबंधित विभागाने विशेष लक्ष द्यावे, असे त्यांनी सांगितले.
*हेमलकसा लोकबिरादरी शाळेलाही भेट*
जिल्हाधिकारी श्री. पंडा यांनी हेमलकसा येथील लोकबिरादरी शाळेलाही भेट देऊन तेथील शैक्षणिक उपक्रम व उपलब्ध सुविधांची माहिती घेतली.
भामरागड तालुक्याची भौगोलिक दुर्गमता लक्षात घेऊन विविध विभागांनी परस्पर समन्वयातून काम करावे. नागरिकांच्या मूलभूत गरजांशी संबंधित प्रलंबित कामे व अडचणींचे विभागनिहाय निराकरण करून विकासकामांना गती द्यावी. विशेषतः या अतिदुर्गम गावांमध्ये रस्ते, पूल, आरोग्य, शिक्षण, घरकुल तसेच इतर शासकीय योजनांची प्रभावी अंमलबजावणी करून पात्र नागरिकांपर्यंत योजनांचा लाभ वेळेत पोहोचवावा, असे निर्देश जिल्हाधिकारी श्री. पंडा यांनी दिले.
या दौऱ्यात एटापल्लीचे प्रकल्प अधिकारी अमर राऊत, भामरागडचे उपविभागीय अधिकारी शुभम पाटील, भामरागडचे तहसीलदार किशोर बागडे यांच्यासह विविध विभागांचे जिल्हा व तालुकास्तरीय अधिकारी उपस्थित होते.
