काँग्रेसचे कार्यकर्ते महेंद्र ब्राम्हणवाडे यांचे आरोप बिनबुडाचे; फडणवीसांच्या दूरदृष्टीने गडचिरोली विकासाच्या मुख्य प्रवाहात – भाजप..
*उद्योग, रेल्वे, रस्ते, आरोग्य व रोजगाराच्या क्षेत्रात परिवर्तन; पत्रकार परिषदेत माजी खासदार डॉ. अशोकजी नेते यांच्यासह भाजपकडून काँग्रेसच्या आरोपांना प्रत्युत्तर*
गडचिरोली जिल्ह्याच्या विकासावरून सुरू असलेल्या राजकीय आरोप-प्रत्यारोपांच्या पार्श्वभूमीवर भारतीय जनता पक्षाच्या वतीने माजी खासदार डॉ. अशोकजी नेते यांच्या गडचिरोली येथील निवासी कार्यालयात आज पत्रकार परिषद घेण्यात आली.
काँग्रेसकडून करण्यात येणारे आरोप वस्तुस्थितीला धरून नसून, जिल्ह्यात सुरू असलेल्या विकासकामांवर राजकीय हेतूने प्रश्नचिन्ह उपस्थित केले जात असल्याचा दावा भाजपच्या वतीने करण्यात आला.
राज्याचे मुख्यमंत्री तथा गडचिरोली जिल्ह्याचे पालकमंत्री देवेंद्रजी फडणवीस यांच्या नेतृत्वाखाली जिल्ह्याच्या विकासाला व्यापक दिशा मिळाली असून, उद्योग, रोजगार, रेल्वे, रस्ते, आरोग्य, शिक्षण आणि पायाभूत सुविधांच्या क्षेत्रात गडचिरोली विकासाच्या नव्या टप्प्यावर पोहोचत असल्याचे भाजपने सांगितले.
पत्रकार परिषदेत माहिती देताना माजी खासदार तथा भाजपा अनुसूचित जनजाती मोर्चाचे राष्ट्रीय महामंत्री डॉ. अशोकजी नेते यांनी आणि भाजपच्या वक्त्यांनी जिल्ह्यातील विविध विकासकामांची माहिती देत काँग्रेसच्या आरोपांना प्रत्युत्तर दिले.
*‘नक्षलग्रस्त जिल्हा’ या ओळखीपासून विकासाच्या नव्या पर्वाकडे*
भाजपच्या म्हणण्यानुसार, पूर्वी गडचिरोलीची ओळख प्रामुख्याने नक्षलग्रस्त व मागास जिल्हा अशी केली जात होती. मात्र, गेल्या काही वर्षांत सुरक्षा व्यवस्था बळकट करण्यासोबतच रस्ते, पूल, दळणवळण, प्रशासकीय सुविधा आणि विकासाच्या विविध प्रकल्पांना गती देण्यात आली आहे.
दुर्गम व आदिवासीबहुल भागांना मुख्य प्रवाहाशी जोडण्यासाठी रस्ते व पुलांच्या माध्यमातून संपर्कव्यवस्था मजबूत करण्यावर भर देण्यात आला. यामुळे शिक्षण, आरोग्य, बाजारपेठ आणि रोजगाराच्या संधींपर्यंत पोहोचण्यास नागरिकांना मदत होत असल्याचा दावा भाजपने केला.
*गडचिरोली ‘स्टील हब’च्या दिशेने वाटचाल*
गडचिरोलीच्या औद्योगिक विकासाचा मुद्दा पत्रकार परिषदेत विशेषत्वाने मांडण्यात आला. सूरजागड परिसरातील लोहखनिजाच्या उपलब्धतेच्या पार्श्वभूमीवर जिल्ह्यात स्टील उद्योगाचा विस्तार करण्यासाठी राज्य सरकारकडून प्रयत्न सुरू असल्याचे भाजपने नमूद केले.
सूरजागड व कोनसरी परिसरातील औद्योगिक प्रकल्पांमुळे स्थानिक पातळीवर रोजगाराच्या संधी निर्माण होण्याची प्रक्रिया सुरू झाली असून, उद्योगांसोबतच स्थानिक युवकांसाठी कौशल्य विकास व प्रशिक्षणाच्या संधी वाढविण्यावर भर देण्याची गरज असल्याचेही भाजपने सांगितले.
खनिज संपत्तीवर आधारित केवळ उत्खनन न करता त्यावर आधारित मूल्यवर्धित उद्योग उभारल्यास स्थानिक अर्थव्यवस्थेला चालना मिळू शकते, अशी भूमिका यावेळी मांडण्यात आली.
*उद्योगासोबत स्थानिक युवकांना रोजगाराची संधी*
गडचिरोलीतील औद्योगिकीकरणाचा लाभ स्थानिक नागरिकांना मिळावा, यासाठी उद्योग, कौशल्य विकास आणि रोजगार यांचा समन्वय आवश्यक असल्याचे भाजपने स्पष्ट केले.
स्थानिक आदिवासी युवकांना प्रशिक्षण देऊन त्यांना औद्योगिक रोजगाराच्या संधी उपलब्ध करून देणे, स्थानिक व्यवसायांना चालना देणे आणि जिल्ह्यातील अर्थव्यवस्था मजबूत करणे या दिशेने प्रयत्न होणे आवश्यक असल्याचेही पत्रकार परिषदेत नमूद करण्यात आले.
*आरोग्य सुविधांच्या विस्तारावर भर*
गडचिरोलीतील आरोग्य सुविधांचा विस्तार हा पत्रकार परिषदेतील महत्त्वाचा विषय ठरला. शासकीय वैद्यकीय महाविद्यालयामुळे वैद्यकीय शिक्षणासोबतच तज्ज्ञ वैद्यकीय सेवांच्या विस्ताराला मदत होत असल्याचे भाजपने सांगितले.
दुर्गम भागातील नागरिकांना वेळेत वैद्यकीय सेवा मिळावी यासाठी आपत्कालीन आरोग्यसेवा, १०८ रुग्णवाहिका तसेच भौगोलिक अडचणी असलेल्या भागांमध्ये बोट ॲम्बुलन्ससारख्या पर्यायी सुविधांचा वापर करण्यात येत असल्याचा दावा यावेळी करण्यात आला.
*वडसा–गडचिरोली रेल्वेसह दळणवळणाच्या प्रकल्पांना गती*
गडचिरोलीच्या औद्योगिक व आर्थिक विकासासाठी रेल्वे कनेक्टिव्हिटी अत्यंत महत्त्वाची असल्याचे भाजपने सांगितले. वडसा–गडचिरोली रेल्वे प्रकल्पासह रस्ते, पूल आणि इतर दळणवळणाच्या सुविधा जिल्ह्याच्या भविष्यातील विकासासाठी महत्त्वपूर्ण ठरणार आहेत.
रेल्वे व रस्ते संपर्काचा विस्तार झाल्यास उद्योग, कृषी, खनिज वाहतूक, व्यापार आणि स्थानिक व्यवसायांना त्याचा फायदा होऊ शकतो, अशी भूमिका पत्रकार परिषदेत मांडण्यात आली.
*६० वर्षांत काय केले?’ – भाजपचा काँग्रेसला सवाल*
पत्रकार परिषदेत काँग्रेसच्या दीर्घकालीन सत्ताकाळावरही भाजपच्या वक्त्यांनी प्रश्न उपस्थित केले. काँग्रेसच्या दीर्घकाळाच्या सत्ताकाळात गडचिरोलीच्या विकासाला अपेक्षित गती मिळाली नाही, असा आरोप भाजपने केला.
“दशकानुदशके प्रलंबित राहिलेल्या प्रश्नांवर आता काम सुरू झाले असताना, प्रत्येक विकासकामात राजकारण शोधण्यापेक्षा काँग्रेसने वस्तुस्थिती जनतेसमोर मांडावी,” अशी भूमिका भाजपच्या वतीने व्यक्त करण्यात आली.
जिल्ह्याच्या दीर्घकालीन विकासासाठी आरोप-प्रत्यारोपांपेक्षा विकासकामांची वस्तुनिष्ठ माहिती आणि त्याचा नागरिकांना होणारा लाभ यावर चर्चा व्हावी, असेही भाजपने म्हटले.
*पंतप्रधान नरेंद्र मोदी जी यांना वाढदिवसानिमित्त डॉ. अशोकजी नेते यांच्या शुभेच्छा*
दरम्यान, आज देशाचे पंतप्रधान नरेंद्रजी मोदी यांचा वाढदिवस असल्याने पत्रकार परिषदेत माजी खासदार डॉ. अशोकजी नेते यांनी त्यांना मनःपूर्वक शुभेच्छा दिल्या.
“देशसेवेसाठी सदैव समर्पित असलेल्या आदरणीय पंतप्रधान नरेंद्रजी मोदी यांना वाढदिवसानिमित्त मनःपूर्वक शुभेच्छा. त्यांना उत्तम आरोग्य, दीर्घायुष्य लाभो आणि त्यांच्या नेतृत्वाखाली देशसेवेचे कार्य अधिक व्यापक व प्रभावीपणे घडो,” अशी भावना डॉ. अशोकजी नेते यांनी व्यक्त केली.
*गडचिरोलीकडे फडणवीसांचे विशेष लक्ष*
मुख्यमंत्री तथा गडचिरोली जिल्ह्याचे पालकमंत्री देवेंद्रजी फडणवीस यांचे गडचिरोली जिल्ह्याच्या विकासाकडे विशेष लक्ष असल्याचे डॉ. अशोकजी नेते यांनी यावेळी नमूद केले.
“मुख्यमंत्री देवेंद्रजी फडणवीस हे गडचिरोली जिल्ह्याचे पालकमंत्री आहेत. राज्याच्या नेतृत्वाची जबाबदारी सांभाळतानाच गडचिरोलीच्या विकासाकडे त्यांनी विशेष लक्ष दिले आहे. जिल्ह्याच्या विकासासाठी प्रत्यक्षात मुक्काम करून स्थानिक प्रश्न समजून घेण्याची त्यांची भूमिका महत्त्वाची आहे. गडचिरोलीसोबतच संपूर्ण महाराष्ट्राच्या विकासाकडे त्यांचे लक्ष आहे,” असे डॉ. नेते यांनी सांगितले.
*विकासकामांची आकडेवारी जनतेसमोर मांडणार*
गडचिरोली जिल्ह्यात झालेल्या आणि सुरू असलेल्या विकासकामांची क्षेत्रनिहाय माहिती, मंजूर निधी, प्रकल्पांची सद्यस्थिती आणि त्यातून निर्माण होणाऱ्या रोजगाराच्या संधी यांची माहिती जनतेसमोर मांडण्याचा निर्धार भाजपच्या वतीने व्यक्त करण्यात आला.
रस्ते, पूल, रेल्वे, उद्योग, आरोग्य, शिक्षण, सिंचन, पर्यटन आणि दळणवळण या सर्व क्षेत्रांचा एकत्रित विकास झाल्यास गडचिरोलीच्या सामाजिक व आर्थिक परिवर्तनाला अधिक वेग मिळू शकतो, अशी भूमिका यावेळी मांडण्यात आली.
*‘विकासाची दिशा आता बदलली आहे’*
गडचिरोलीकडे केवळ नक्षलग्रस्त किंवा मागास जिल्हा म्हणून पाहण्याची मानसिकता बदलून, खनिज संपत्ती, वनसंपदा, कृषी, पर्यटन आणि मानवी संसाधनांच्या आधारावर जिल्ह्याची नवी ओळख निर्माण करण्याची प्रक्रिया सुरू असल्याचे भाजपने सांगितले.
मुख्यमंत्री तथा पालकमंत्री देवेंद्रजी फडणवीस यांच्या नेतृत्वाखाली सुरू असलेल्या विकासप्रक्रियेत स्थानिक नागरिक, आदिवासी समाज, युवक, शेतकरी आणि उद्योजक यांचा सहभाग वाढविणे आवश्यक असल्याचेही पत्रकार परिषदेत नमूद करण्यात आले.
गडचिरोलीच्या विकासाच्या प्रश्नावर राजकीय मतभेद असले तरी जिल्ह्यातील विकासकामांची प्रत्यक्ष प्रगती, प्रकल्पांची सद्यस्थिती आणि त्याचा स्थानिक नागरिकांना होणारा लाभ याबाबत तथ्याधारित चर्चा व्हावी, अशी अपेक्षा यावेळी व्यक्त करण्यात आली.
या पत्रकार परिषदेला प्रामुख्याने भाजपा जिल्हाध्यक्ष रमेशजी बारसागडे, आदिवासी मोर्चा प्रदेशाध्यक्ष तथा माजी आमदार डॉ. देवरावजी होळी, माजी जिल्हाध्यक्ष प्रशांत वाघरे, नगराध्यक्षा अँड. प्रणोती सागर निंबोडकर, किसान मोर्चा प्रदेश सचिव रमेश भुरसे, महिला मोर्चा प्रदेश सचिव रेखाताई डोळस, भाजपच्या नेत्या चंदाताई कोडवते, शहराध्यक्ष तथा न.प. सभापती सिम्माताई कन्नमवार, जिल्हा उपाध्यक्ष अरुणजी हरडे, ज्येष्ठ नेते डॉ. भारत खटी, कामगार आघाडीचे जिल्हाध्यक्ष सुधाकरजी पेटकर, संजय बारापात्रे, सलीम शेख तसेच मोठ्या संख्येने भाजप पदाधिकारी व कार्यकर्ते उपस्थित होते.
